Blog - Tous les billets

واحد الماصو دخل للدار لعشية ...بدل حوايجو

حكم التيليكوموند و قابل التليفزيون

و قالها يا مرا ...الله يسترك قطيعينا هاذيك الدلاعة 

و حطيها تبرد الرحمة على والديك ...

أيا قاتلو : يعني هكذا ..غير التفراج ...ما تحكي معايا ..

ما تريح تتناقش ...!؟  علاش حنا ما نتناقشوش في كاش موضوع كيما تاع المسلسلات و كل واحد يمد رايو  !!?

هنا خونا دار رفعة شمة و قالها :

صحا يا سيدي نتناقشو ...زعما لو كان ندخل في مشروع ونفشل فيه واش ندير ؟

قاتلو : باينة ما تبقاش أتبع في خسارتك ...جرب مشروع آخر

قالها : اوكي ... ولوكان ننجح فيه واش ندير ؟

قالت : توسع في مشروعك أكثر ودير مشاريع أخرى جديدة....

هنا عاود سقساها : أيوااه درك نتي واش رايك في مشروع زواجنا ؟!!!

فاشل ولا ناجح ؟؟!

يُقال أنها الى يومنا هذا ما نطقتش بكلمة 

هنا هي حارتلها واش تجاوب ...تقول فاشل يجرب غيرها .. تقول ناجح يوسّع فالمشروع ! 

العبرة من القصة: أخطيك من المناقشة و التفلسيف يامرا

هل تعلم :
أن أصحاب البحر يقولوا "تبحرتلي"، وأصحاب الدوار "تودرتلي"، وأصحاب الغابة "غابتلي"، وأصحاب التل "تلفتلي" وأصحاب الصحراء "صحروني" وهي ضاعت له.

الثور كي يطيح يكثرو مواسو

واللحم كي يريح يهزوه ناسو

والجايح كي تقيمو يعلا ساسو

ولي كبروه المحاين يشيب راسو

ولي تعاونو فالقبر يهربلك بفاسو

دارت الدنيا والرجال راهم يتقاسو

حتى الحمار واسمح في حلاسو

ولي عندو شي جنان خانو عساسو

شوف بعينيك حيين وراهم ينداسو

حتى السبع دخلت سوسة في ضروسو

والذيب راه يتحكم وينوع في لباسو

والجاجة تشطح للديك في ليلة عرسو

والفاهم يفهم لغة الطير وحافظ دروسو